Доколку ви е потребна помош за комуникација на друг јазик, можеби ќе треба да соработувате со преведувач или толкувач. Иако и двата работат со јазик, тие вршат различни задачи.

Како да одлучам кој ми е потребен?

Ако се работи за писмен текст, потребен ви е преведувач. Ако се работи за говор или знаковен јазик, потребен ви е толкувач.
Размислете дали споделувате документи или водите разговор.

Што прави преведувачот?

Преведувачот работи со писмени материјали. Неговата работа е да земе писмен текст на еден јазик и да создаде точна, културно соодветна верзија на друг јазик.

Еве неколку вообичаени примери за тоа што прават преведувачите:

• Изводи од матичната книга на родени, возачки дозволи и други документи за идентификација
• Изводи од матичната книга на родени, возачки дозволи и други документи за идентификација
• Медицински извештаи
• Веб-страници, брошури и маркетиншки материјали
• Имејли, писма и писмени упатства
• Прирачници за употреба

Преводот не е само замена на зборови од еден јазик на друг. Добриот преведувач се грижи значењето да биде јасно и конзистентно, терминологијата да биде точна и тонот да одговара на намената на документот. Во Австралија, многу организации, како што се владините оддели, бараат преводите да ги изработува NAATI сертифициран (NAATI-certified) преведувач. Ова гарантира квалитет и одговорност.

Што прави толкувачот?

Толкувачот работи со говорен или знаковен јазик, помагајќи им на луѓето што зборуваат различни јазици да комуницираат во реално време.

Можеби ќе ви треба толкувач кога:

• Одите на медицински или здравствени прегледи
• Разговарате со Centrelink, полицијата или други владини служби
• Учествувате на деловни состаноци
• Учествувате во правни постапки
• Присуствувате на конференции, семинари или настани во заедницата

Толкувачите слушаат што се зборува на еден јазик и ја пренесуваат пораката точно и природно на друг јазик. Тие можат да работат на лице место, преку телефон или преку видео. Во многу ситуации, особено во здравствен и правен контекст, точното толкување е од суштинско значење за да се осигури дека луѓето ги разбираат своите права, одговорности и избор.

Што ако имам комбинација од писмени и усни материјали?

Понекогаш, толкувачите или преведувачите можат да работат со комбинација од писмени и усни/знаковни материјали. На пример:

• Усно преведување на писмен текст (Sight translation): толкувачот чита писмен документ (на пример, болнички формулар за давање согласност) и веднаш го преведува на друг јазик, усно или на знаковен јазик
• Транскрипција: преведувачот слуша снимен говор и го пишува на друг јазик

Добар начин да се размислува за ова е: каков ќе биде крајниот производ? Ако е документ, ќе ви треба преведувач. Ако е говор, разговор или видео, ќе ви треба толкувач.

Каде можам да најдам квалификувани професионалци?

Без разлика дали станува збор за толкувач или преведувач, најдобро е да изберете некој што е NAATI сертифициран. NAATI има различни професионални сертификати и за преведувачи и за толкувачи, а сертификацијата помага да се осигурате дека лицето што ви е потребно ги има вештините и обуката потребни за прецизно пренесување информации на внимателен и професионален начин.

Можете да најдете преведувач или толкувач во онлајн именикот на NAATI (NAATI’s online directory).